कोल्हापूर : मोडी लिपी शिकू इच्छिणाऱ्यांसाठी एक सुवर्णसंधी आहे. ३० डिसेंबर २०१९ ते पाच जानेवारी २०२० या कालावधीत कोल्हापूरच्या शिवाजी विद्यापीठात मोडी लिपीचे मोफत प्रशिक्षण घेता येणार आहे. छत्रपती शाहू महाराज मराठा इतिहास अध्ययन केंद्र, इतिहास अधिविभाग, शिवाजी विद्यापीठ यांच्यामार्फत मोडी लिपी प्रशिक्षण कार्यशाळा आयोजित करण्यात आली आहे.
शिवपूर्वकाळापासून ते स्वातंत्र्यकाळापर्यंत प्रशासनात, तसेच दैनंदिन कामकाजासाठी मराठी भाषेबरोबरच मोडी लिपीचा प्रमुख वापर होत असल्याने त्या काळाचा इतिहास अभ्यासण्यासाठी ही लिपी ज्ञात असल्याशिवाय संशोधन होऊच शकत नाही. तसेच या काळातील कोणत्याही प्रशासकीय नोंदीच्या अभ्यासाकरिता ही लिपी ज्ञात असणे अपरिहार्य आहे.
समकालीन सामाजिक शास्त्राच्या विद्यार्थ्यांपुढे नोकरीच्या संधीचा अभाव ही मोठी समस्या आहे; मात्र या विद्यार्थ्यांकडे एखादे कौशल्य असेल तर ते या समस्येवर सहजपणे मात करू शकतील. १९६०पूर्वीच्या शेतीसंबंधीच्या नोंदी, जन्म-मृत्यू नोंदी, खरेदीपत्रे तसेच या काळातील न्यायालयीन दावे यासंबंधीची सर्व कागदपत्रे मोडी लिपीतच उपलब्ध आहेत. मोडी लिपीचे ज्ञान असणारी व्यक्ती अशा कागदपत्रांचे लिप्यंतर करून समाजास आपले योगदान देऊन आपल्या उपजिविकेचा प्रश्नही सोडवू शकते.
मोडी लिपी ज्ञानाचा सर्वाधिक फायदा इतिहास व तत्सम सामाजिक शास्त्रांमध्ये संशोधन करू इच्छिणाऱ्या विद्यार्थ्यांना होणार आहे. शिवपूर्व काळापासून इंग्रजी सत्तेच्या कालखंडातील महाराष्ट्र व बृहन्महाराष्ट्राबाबत कोणत्याही विषयावर संशोधन करावयाचे असेल, तर मोडी लिपीचे ज्ञान असल्याशिवाय पर्याय नाही.
ही काळाची गरज लक्षात घेऊन ही प्रशिक्षण कार्यशाळा आयोजित करण्यात आली आहे. मच्छिंद्र चौधरी (मोडी पंडित, डॉ. बाबासाहेब आंबेडकर मराठवाडा विद्यापीठ, औरंगाबाद) आणि डॉ. नीलांबरी जगताप (छत्रपती शाहू महाराज मराठा इतिहास अध्ययन केंद्र, इतिहास अधिविभाग, शिवाजी विद्यापीठ, कोल्हापूर) यांचे मार्गदर्शन या कार्यशाळेत लाभणार आहे.
या कार्यशाळेला विनामूल्य प्रवेश आहे. विद्यार्थी-विद्यार्थिनी, संशोधक, इतिहास अभ्यासक, इतिहासप्रेमी यांनी या कार्यक्रमाचा लाभ घ्यावा, असे आवाहन केंद्राच्या समन्वयक डॉ. नीलांबरी जगताप यांनी केले आहे.
संपर्क :
समन्वयक, छत्रपती शाहू महाराज मराठा इतिहास अध्ययन केंद्र, शिवाजी विद्यापीठ, कोल्हापूर.
फोन : (०२३१) २६०९४२७
इतिहास अधिविभाग, शिवाजी विद्यापीठ, कोल्हापूर.
फोन : (०२३१) २६०९२००